Awl ´s gleiche. Dahoam is´ einfach a Katastrophe. Gega Scheedool ham´s eitz a gscheite Bläschn dawischt. Sechs-Zwoa. Und wos soll ma sogn - d´Gegentore hamma eahr de mehran selwa gschossn. De andern san af unserm kloana Blotz besser z´recht kemma wei mia. Gitt´s nomal goar net.

De andern war´n aa einfach awl schneller und ham besser zamm gspielt wei mia. Und no dazou war jeda Fölla glei a Gegentor. Etz woar owa bei Scheedool net amol da Heimerl dabei, der wei scho 10 Dore gschossn hod heia.

Glei am O´fang hod der Knott Manuel an 25-Meter-Freistoß vom Ederer aussa. Mords gfährlich. Und glei danoch hod da Matsche Bech ghabt bei an Kopfball. Der Vodeidiger hod´n no o´gfälscht, dass a knapp am Pfosten vorbei is.

Zérst hods net schlecht hergschaut. Dann is aa no glei ´s Oans-Null gfolln noch ana knappen Viertlstund. Da Hofe hod hou am Matsche umme gflankt und der hod´n glei dant vors Tor brocht. Da Götz Stefan hodn bloß no iwa d´Linie ummedrucka braucha. Owa des Tor war scheinbar Gift. Danoch is nimmer vüll zamm ganga.

Glei danoch hod wieda der Ederer an Freistoß vo rechts gfährlich afs Tor brocht, owa wieda hod´n da Manuel abwehrn kinna. An drittn hod er dann eineghaut in der 22. Minutn. Aus zwanzg Medda flach ins Torwarteck. Wos do owa fir a Mauer gstellt ham, des mecht i aa wissn. Und nacha is richtig dick kemma. Und der Schiri hod a Zeitlang nur no Dreck pfiffa. Fir jedn Dreck gega Traumboch a Gelbe hergebn und gega  Scheedool nix. A absolute Frechheit dann des Zwoa-Oans fir de andern. Z´erst geht da Beier voll mitm Gstrecktn afn Haberl drauf und legt se damit an Ball in Strafraum vor und wei de Flanke vom Beier dann an Haberl sein Bauch onespringt - no dazou hod se da Habi vom Ball wegdraht - pfeift er Hand-Elfmedda. Do flippst aus.

Da Rötzer hod´n Elfmedda eineghaut und da Manu hätt na beinah no ghot.

Noch dem Elfmedda war´s dann a doddale Katastrophe. Vo de unsern hod koana mehr an anständigen Pass spülln kinna und alle warn nervös und wei o´gwurzelt. Dafir ham de andern richtig Gas gebn und vorn draaf gschobn. In der 35. Minutn dann da nächste Bock. Da Berti spüllt zruck afn Timo. Der schlofft und segt net dass da Stangl kimmt. Da Stangl geiht dazwischen und überrennt ´n Timo. In der Mitt is da Baier dann doddal frei gstandn, weils den vorher eigentlich im abseits steh loussn ham. Da Stangl hod eina gspüllt und da Baier hodn aus 10 Meter eine ghaut.

Net oans vo de drei Gegentore war normal. Lauter Hodan oder Bschiss. Owa de unsern ham aa vüll zweng do. Mit so ana Laufbereitschaft voluist gega jedn. Grennt is bloß der, wei an Ball ghabt hod.

Owa noch der Halbzeit is net besser wordn. Von wegen vorn draaf schuibn oder so - nix hod ma gseng. Planlos. Koa Chance afs zwoate Tor, dass ma wieder im Spiel gwen waar. Nadirle is da Mich im Mittelfeld gscheit o´ganga, weil er gegan Stangl gspüllt hod.

Na hamma bold ´s vierte kreigt (53.). Wieda so a Gstell. Hams wieder im Mittelfeld oan renna loussn, koana gscheit higlangt, erst nacha da Habi, owa dann war er scho im Strafraum. Elfer. Und da Habi hod gelb-roud kreigt, weil er beim Elfer in da erstn Halbzeit ´s Maal net gholtn hod. Da Rötzer hod na wieder vowandelt. 1:4. Na is´ richte dahi ganga. Zu zehnt - wos willst do no reissn. A boar Minutn später hams bei an Freistoß gschloffa. Schnell ausgführt vom Stangl und oana hod na no o´gfälscht. 1:5. Da Götz Stefan hod na wenigstens no ´s fünf-zwoa gschossn.

Owa glei draaf ham de andern numml an Elfer kreigt und wieda hod na da Rötzer einebrocht. Sechs-Zwoa is ausganga.

O mei. Do fragt ma se scho, wos do af amol lous is. Und eitz de letzan drei Spülle, do wirds hoart: Atzenzell, Stachasraeid und Woldminga. Etz kinnads schaua, dass sa se numml fangan, weil sunst konns kritisch werdn.